संयुक्त राज्य अमेरिकाको म्यासाचुसेटस्स्थित जिलेट स्टेडियममा भएको खेलमा अर्जेन्टिनाका गोन्जालो हिग्विनले खेलको ८ औं मिनेटमा गोल गर्दै टिमलाई अग्रता दिलाएका थिए । हिग्विनले नै २८ औं मिनेटमा दोस्रो गोल गर्दै जितलाई थप बलियो बनाएका थिए ।
खेलको पहिलो हाफमा २-० ले अग्रता लिएको अर्जेन्टिनाले दोस्रो हाफमा पनि भेनेजुएलालाई दबाबमा राख्यो । अर्जेन्टिनी स्ट्राइकर लियोनल मेसीले खेलको ६० औं मिनेटमा गोल गर्दै भेनेजुएलामाथि ३-० को अग्रता दिलाए ।
तर, भेनेजुएलाका सालोमोन रोन्डोनले ७० औं मिनेटमा गोल गरेर अर्जेन्टिनासँगको गोल अन्तर कम गरे । तर उनको गोल केबल सान्त्वना गोलको रुपमा मात्रै रह्यो। भेनेजुएलाले गोल गरेको एक मिनेटमै सब्सिच्युट्मा आएका अर्जेन्टिनाका इरिक लामेलाले गोल गरे ।
अब अर्जेन्टिनाले सेमिफाइनलमा संयुक्त राज्य अमेरिकासँग प्रतिस्पर्धा गर्ने छ । उक्त खेल जुन २१ मा हुनेछ ।
